Xudur,(insidesomalia.org)-Dhaq dhaqaaq milatari ayaa laga soo sheegayaa Degmada Xudur ee Gobolka Bakool, kaasi oo hakad galiyay dhaq dhaqaaqa ganacsi ee degmadaasi.

Gaabiskaan ku yimid howlihii adeega bulsha ee degmada Xudur ee Gobolka Bakool shalay galinkii dembe iyo saaka ayaa waxa uu ka dambeeyay ka dib markii gudaha Magaaladaasi ay dhaq dhaqaaq iyo hub aruursi ay ka bilaabeen gudaha Degmada Maamulka degmada Bakool iyo kan Degmada Xudur.

Dhaq dhqaaqa Ciidan ay wadaan Maamulka Gobolka ayaa waxa uu yimid kadibmarii agagaaraha Degmada Xudur ay soo gaareen xoogaga Mucaaradka ah ee ka soo horjeeda siyaasada Dowlada KMG ah ee Soomaaliya iyo joogitaanka Ciidamada Itoobiya, iyadoo xoogagaasi la tilmaamay in ay duulaan ku soo yihiin Magaalada Xudur.

Ciidamada Booliska ee Maamulka Xudur ayaa lagu soo waramayaa in ay difaac adag ku galeen Saldhiga Ciidanka Booliska ee Degmada Xudur halka kuwo kale ay gaaf wareegayaan gudaha iyo daafaha Magaalada Xudur.

Goob jooge diiday in la shaaciyo magaciisa ayaa shabelle u xaqiijiyay in hakad uu galay dhaq dhaqaaqa ganacsiga ka dib markii ay soo ifbaxeen warar sheegaya in xoogaga Mucaaradka ay duulaan ku soo yihiin degmada Xudur iyadoo ciidamada maamulka degmada ay galeen feejignaan.

Guddoomiyaha Maamulka Bakool Maxamed Cabdi ayaa ka gaabsaday in uu faah fahin ka bixiyo dhaq dhaqaaqa ciidan ee ka jira degmada iyo xoogaga mucaaradka oo la sheegay in ay duulaan ku soo yihiin Degmada Xudur ee Gobolka Bakool

Lama oga halka uu xaalka Degmada Xudur uu ku dembeyndoono Saacadaha soo socda Degmada Xudur xili ay ka jiraan dhaq dhaqaaq Ciidan Degmadaasi.